Среда, 30 ноября, 2022   |    Елчĕк район хаçачĕ
Главная > Публикации > Улатăртан Шупашкар таран

Улатăртан Шупашкар таран

Чăваш Енре экологи субботникĕсем иртрĕç

Апрелĕн 23-24-мĕшĕсенче республикăри хуласемпе ялсенче пурăнакансем урамсене, парксемпе скверсене, картишсене çÿп-çапран тасатрĕç. Экологи акцийĕсене йĕркелекенсем – Чăваш Республикин Строительство министерстви тата «Пĕрлĕхлĕ Раççей» партин Чăваш регион уйрăмĕ. Вĕсене чылай предприяти, волонтерсем, общество ĕçĕн хастарĕсем, вузсемпе колледжсен студенчĕсем пулăшрĕç.

– Эпир акцие ырласа йышăнтăмăр, территорисене хĕл каçиччен пухăннă çÿп-çапран тасатма хаваспах хутшăнтăмăр. Пирĕншĕн республика çĕрĕ таса пулни, çынсем хăйсене хăтлă туйни уйрăмах пĕлтерĕшлĕ, – терĕ «Пĕрлĕхлĕ Раççей» партин Чăваш регион уйрăмĕн секретарĕ Алена Аршинова. – Районсемпе хуласенче пурăнакансем те акцие хутшăнни питĕ савăнтарать. Хамăр алăпа картишсене, скверсене, парксене тасатрăмăр. Çак ĕçе малашне те час-часах пурнăçлăпăр.

Çĕнĕ Шупашкар, Улатăр, Комсомольски, Канаш, Муркаш, Елчĕк… Чăваш Республикин кашни кĕтесĕнче, пысăк тата пĕчĕк хуласемпе ялсенче экологи акцийĕсем иртрĕç.

Улатăрта субботник чăн-чăн уява çаврăнчĕ. Кунти ветерансен паркĕнче пĕрремĕш хут экологин «Таса вăййисене» йĕркелерĕç. Çÿп-çапа хăвăртрах тата нумайрах пухассишĕн 17 команда тупăшрĕ. Çапла вара паркран 500 михĕ ытла илсе тухрĕç.

Шупашкарта уйрăмах «Çĕнтерÿ» паркĕнче ĕç вĕресе тăчĕ. Кунта трактор завочĕн ĕçченĕсем, «Пĕрлĕхлĕ Раççей» парти хастарĕсем, Шупашкарти апатлану технологийĕн тата коммерци техникумĕн студенчĕсем, хула çыннисем вăй хучĕç. Çĕнтерÿ кунĕ умĕн мемориал территорине тасатни питех те кирлĕ, вăхăтлă тата вырăнлă. Паркри субботникре «Пĕрлĕхлĕ Раççей» партирен суйланнă РФ Патшалăх Думин депутачĕ Леонид Черкесов та ĕçлерĕ.

– Коммуналлă службăсем, депутатсем, «Пĕрлĕхлĕ Раççей» парти волонтерĕсем, ТОС хастарĕсем, Шупашкар çыннисем хуламăра çÿп-çапран тасатма хастар хутшăнчĕç, – терĕ Леонид Черкесов.

Республика районĕсенче субботниксене астăвăм вырăнĕсенче, кăçал тата килес çул хăтлăлатма палăртнă общество территорийĕсенче ирттерчĕç. Сăмах май, хулан хăтлă хутлăхĕсене йĕркелемелли проектсемшĕн ку эрнере 21.gorodsreda.ru сайтра сасăлама пуçланă. Сăнăр, хăвăра килĕшекен проекта палăртăр, уншăн сасăлăр. Хулана пĕрле хăтлăлатар.

Сăн ÿкерчĕксенче: Шупашкарти «Çĕнтерÿ» паркри субботникре – РФ Патшалăх Думин депутачĕсем Леонид Черкесов тата Алена Аршинова.

Добавить комментарий

Ваш адрес email не будет опубликован.

*

code