Республикăра хушма хуçалăхра хăйсен ĕçне йĕркеленисем патшалăх пулăшăвĕпе усă курма пултарĕç. Çакăн валли документсем йышăнмалли черетлĕ тапхăр пуçланчĕ.
Чăваш Республикин Ял хуçалăх министерстви документсене паянтан пуçласа раштавăн 3-мĕшĕччен йышăнать. Программăпа килĕшỹллĕн профтупăшшăн налук тỹлекен ял çыннисем патшалăх пулăшăвĕпе усă курса 3 ĕне таран туянма, кашни ĕнешĕн 70 пин тенкĕ таран саплаштарма пултараççĕ. Качака е сурăх туянсан вара пĕр пуçшăн 5 пин тенкĕ илĕç. Унсăр пуçне сĕт паракан ĕнене пăхмашкăн — пĕр пуçшăн 7,5 пин тенкĕ, сурăх е качакашăн 500 тенкĕ илме пулĕ. Пулăшу шутĕнче çавăн пекех — ĕнесене пĕтĕлентерме расхутланнин 90, вăрлăха лабораторире тĕрĕслеттерессин тата тăпрана агрохими тĕпчевĕ туса ирттерессин 50, техникăпа тĕрлĕ хатĕр тата пыл хурчĕ тытмашкăн тĕрлĕ материал туяннин тăкакĕсен 40, минераллă удобрении хакне 30% чухлĕ саплаштарасси.
