Çуллахи кунсенче пурте шыв хĕррине васкаççĕ. Шыва кĕнĕ чухне вара питĕ асăрхануллă пулмалла — инкек-синкек сиксе ан тухтăрах. Çак йĕркесене асрах тытар:
— Ишме пĕлмесен шыва пилĕк таран анчах кĕрĕр.
— Палăртнă вырăнтан иртсе нихăçан та ан ишĕр.
— Причалта, пристаньре шыва ан кĕрĕр.Пăрахут, катер, баржа çывăхне ишсе ан пырăр.
— Вĕрсе хăпартнă матраспа, теттесемпе, автомобиль шинипе шыва ан кĕрĕр.
— Пĕлмен вырăнта шыва кĕме юрамасть.
— Çынна нихăçан та шыва ан тĕкĕр — сивĕ шывра аптăраса ỹкме пултарать.
— Шывра ан иртĕхĕр, пĕр-пĕрне ураран ан туртăр.Пĕччен шыва ан кĕрĕр, ыттисене те пĕччен ан хăварăр.
— Ачасене хăйсем тĕллĕн шыв хĕррине ан ярăр.
— Апатланнă хыççăн 1,5-2 сехетрен кăна шыва кĕме юрать.
— Ỹсĕр чухне шыв хĕррине ан кайăр.
— Япăх çанталăкра шыва ан кĕрĕр.
Шывра темĕн те пулма пултарать, çавăнпа çак уйрăмлăхсене пĕлни юрать:
— ишнĕ чухне ывăнсан çурăм çине выртса лăпкăн ишсе илмелле;
— сывлав органĕсене шыв лексен хыттăн ỹсĕрсе илмелле;
— урана шăнăр туртсан çурăм çине выртмалла та мышцăсене сăтăрмалла, пысăк пỹрнерен тытса урана тăсма тăрăшмалла;
— путма пуçласан алăсене сарса çурăм çине выртмалла, йывăр тумтире хывмалла.
Çын путнине курсан:
— ишме пĕлетĕр пулсан тумтир хывса шыва чăмăр, путакана лăплантарма тăрăшăр та шыв хĕррине илсе пырăр;
— ишме пĕлмесен шыва ан кĕрĕр, путакана патак е вĕрен ывăтса парăр, пулăшу чĕнĕр.
