Çулсерен çĕр чăмăрĕ çинче 15 миллиона яхăн ача вăхăтсăр çуралать. Кашни çулах ноябрĕн 17-мĕшĕнче пĕтĕм тĕнчери вăхăтсăр çуралнă ачасен кунне паллă тăваççĕ. Унăн тĕллевĕ — вăхăтсăр ача çуралма пултарасси пирки пĕлỹлĕхе ỹстересси, вăхăтсăр çуралнă ачаллă çемьесен, ача сывлăхĕн ыйтăвĕсем çине тимлĕх уйăрасси.
Вăхăтсăр çуралнă пепкене сывлăх сыхлавĕн учрежденийĕнчен киле кăларнă хыççăн ашшĕ-амăшĕн мĕне тĕпе хумалла-ха? Çакна Елчĕкри тĕп больницăн педиатр тухтăрĕ Наталия Кускова уçăмлатать:
— Ачан пỹлĕмĕнче уншăн хăтлă сывлăш температури пултăр — 24 градуса яхăн ăшă, нỹрĕк 50 процента яхăн. Çакăн валли ăшă утиялсемпе, сывлăшра кирлĕ нỹрĕк тытакан приборсемпе усă курма пултаратăр;
— Пепкене час-часах тата пĕчĕк порцисемпе апатлантарăр. Кăкăр сĕчĕ çак ачасемшĕн уйрăмах усăллă иккенне ан манăр;
— Пĕчĕкскерĕн ачаш ỹтне аллерги паман, хỹтĕлекен ятарлă хатĕрсемпе анчах сĕрĕр;
— Тухтăр патне тĕрĕслев тата вакцинаци графикĕпе тăтăшах çỹрĕр;
— Уçă сывлăшра уçăлса çỹреме майĕпен, кĕске тапхăрсенчен пуçлăр.
Ан манăр: çак пĕчĕк пепкесем хăйсене питĕ пысăк тимлĕх уйăрнине, питĕ лайăх пăхнине тивĕç.
