— Сыра илемлĕ те çỹхе касмашкăн шăл тасатмалли ятарлă çиппе усă курма юрать.
— Сыра теркăланă чухне вăл ан çыпăçтăр тесен теркăна тип çу сĕрмелле е ăна малтан морозильникра тытмалла.
— Укроп-петрушкăна хĕл валли морозильникра ятарласа пăр тумалли формăсенче шăнтма юрать. Ун пек меллĕ — пĕрер порци пулать.
— Вĕрекен шыври какая вилкăпа темиçе тĕлтен шăтарсан вăл хăвăрт пиçет, сĕтеклĕ пулать.
— Цитрус çимĕçĕсене, помидора холодильникра упрасан сивĕ температура вĕсен тутине, шăршине чакарать.
— Пушă контейнерсене упранă чухне кăшт тăвар сапса хупсан ырă мар шăршăран хăтăлма май килет.
— Чили пăрăçа касиччен алла тип çу сĕрмелле: хаярскер ун пек вĕтелмĕ.
— Холодильникри ырă мар шăрша активланă кăмрăк туртса илет.
— Алюмини кастрюль тĕксĕмленчĕ-и? Унта пан улми хуппи ярса вĕретсен вăл çĕнелет, кухньăна та ырă шăршă сарăлать.
— Кухньăри чỹрече янахĕ çинче алоэ ỹстерни аван. Тăрук пиçсе кайнă вырăна хăвăрт кăна алоэ çулçине татса лаймакипе суран çине хумалла.
