Апрелĕн 17-мĕшĕнче Чăваш Республикин Пуçлăхĕ Олег Николаев пресс-конференци ирттерчĕ. Журналистсем хăйсене кăсăклантаракан ыйтусене регион ертỹçине куçа-куçăн тĕл пулса та, видео мелĕпе те пама пултарчĕç. Пресс-конференцие регионти, муниципаллă тата çавăн пекех федераллă массăллă информаци хатĕрĕсен представителĕсем хутшăнчĕç.
Пресс-конференци икĕ сехет ытла тăсăлчĕ. Çак вăхăтра Олег Николаев пĕтĕмпе 30 ытла ыйтăва хуравларĕ. Журналистсем пурăнмалли çурт-йĕрпе коммуналлă хуçалăх услугисен тарифĕсем, граждансен тĕрлĕ категорийĕсене социаллă пулăшу парас, республикăри обществăпа политика лару-тăрăвĕ, Чăваш Ене малалла аталантарас тата ытти ыйтусене хускатрĕç. Вырăнти пĕлтерĕшлĕ чăрмавсене те асăнмасăр иртмерĕç.
— Эпир паян чылай ыйтăва хускатрăмăр, вĕсенчен кашнинех эпĕ май килнĕ таран тỹррĕн те конкретлă хуравлама тăрăшрăм, — палăртрĕ республика Пуçлăхĕ Олег Николаев. — Халăха хумхантаракан çакăн пек çивĕч темăсемпе калаçассине ỹлĕмрен те тăсмалла. Ку вăл малашлăх йышăнусем туса хатĕрлеме питĕ усăллă.
Юлашкинчен регион ертỹçи массăллă информаци хатĕрĕсен ĕçченĕсене пĕрлехи ĕçшĕн тав турĕ.
