Чăваш Республикин Пуçлăхĕ Олег Николаев:
«Чăваш Енре шкул ачисен хушшинче тĕрĕс наукăсене вĕренес интерес ỹсни курăнать. Ашшĕ-амăшне, педагогсене, аслă шкулсене тата предприятисене вĕренỹ процесне явăçтарни ырă çимĕç парать. Республикăра тĕрĕс наукăсене аталантарма условисем çителĕклĕ, ку енĕпе малашне те тивĕçлĕ ĕçлесе пырăпăр».
Паян — майăн 23-мĕшĕнче — Чăваш Республикинче патшалăхăн пĕрлехи экзаменĕсен (ППЭ) тĕп тапхăрĕ старт илчĕ. Кăçал республикăри шкулсенчен 11-мĕш класран — 5 пине яхăн вĕренекен тухать, 15 пин ача 9-мĕш класс пĕтерет. Экзаменсене уççăн тата хăрушлăхсăр ирттересси тĕп вырăн йышăнать. Çавăн пекех вĕренсе тухакансене психологи пулăшăвĕ парасси çине уйрăмах тимлĕх уйăраççĕ.
Шкул ачисем хушшинче тĕрĕс наукăсене вĕренес туртăм ỹсни паллă. Вĕренсе тухакансен 21 проценчĕ — физика, 59 проценчĕ — профиль шайĕнчи математика, 19 проценчĕ — биологи, 16 проценчĕ хими предмечĕсене суйлани паллă.
Республикăра хушма вĕренỹ программисене аталантаракан проектсем пурнăçланаççĕ. Шкулсенче 200 ытла ăслăлăх обществи ăнăçлă ĕçлени, ял олимпиадисене йĕркелени ырă çимĕç парать.
ППЭ иртнĕ чух пропуск режимне йĕркеленĕ. Общество йĕркине сыхлас тата медицина пулăшăвĕ парас ĕçре полици тата медицина сотрудникĕсем яваплăха çирĕп туяççĕ. Кăçал экзаменсене йĕркелесе ирттерес ĕçе — 5 пин ытла ĕçчене, экзамен комиссийĕсен 200 членне, 300 ытла общество сăнавçисене явăçтарма палăртнă. Патшалăх пулăшăвĕн порталĕнче йĕркене пăснă тĕслĕхсем пирки тỹрех Рособрнадзора пĕлтерессине ĕçе кĕртнĕ. Çакăн валли кашни пунктра QR-кодлă плакатсем вырнаçтарнă. Экзаменсем пурĕ 38 пунктра иртеççĕ. Онлайн-видео сăнавне йĕркелени экзаменсем мĕнле пынипе паллашма май парĕ. Унсăр пуçне «хĕрỹ лини» ĕçлĕ.
Аса илтеретпĕр, ыран — майăн 24-мĕшĕнче — шкулсенчен вĕренсе тухакансемшĕн юлашки шăнкăрав янăрĕ.
