Пуш (март) — çуркуннехи пĕрремĕш уйăх. Халăхра ун пирки «тумла уйăхĕ», «курак уйăхĕ» тесе каланă. Ку уйăхра сивĕсем пулсан та вăраха тăсăлмаççĕ. Тỹпе таса та кăн-кăвак. Сывлăш уçă.
Пуш уйăхĕн 20-мĕшĕнче кунпа çĕр танлашать. Ун хыççăн шăнкăрч вĕллисем çакма тытăннă.
Авалхи Руçре пушăн 14-мĕшĕнче çуркуннене кĕтсе илмелли йăла-йĕркене тунă. Халăхра çак куна Алтатти (Евдоки) кунĕ теççĕ. Çак кун автан ĕçмелĕх шыв пулмалла. Шăпах çак кун кайăксем кăнтăртан вĕçсе килеççĕ-мĕн.
Пуш мĕнле — çĕртме çапла.
Нарăс — çил-тăманпа, пуш уйăхĕ тумлампа вăйлă.
Тумла пăрĕ вăрăм пулни çуркунне вăрăма каяссине систерет. Тумла пăрĕ кĕске тĕк — çуркунне хăвăрт пулать.
Пуш уйăхĕнче тĕтре тăтăш пулсан çу йĕпе килет.
Пуш уйăхĕ — типĕ, ака уйăхĕ — йĕпе, çу уйăхĕ сивĕ пулчĕ тĕк тыр-пул ăнса пулать.
