ЧР Министрсен Кабинечĕн черетсĕр ларăвĕнче пĕрремĕш ача çуралсан (усрава илсен) уйăхсерен паракан тỹлеве палăртассипе тата тỹлессипе çыхăннă полномочисене «Социаллă пулăшу мерисемпе тивĕçтерекен центр» хысна учрежденине парассине ырланă.
Çакнашкал центрсем кашни район-хуларах пур. ЧР Ĕçлев тата социаллă хỹтлĕх министрĕ Сергей Димитриев каланă тăрăх, вĕсем пурте ку енĕпе ĕçлеме хатĕр. Тỹлевсем валли федераци бюджетĕнчен пĕтĕмпе 143,5 миллион тенкĕ пăхса хăварнă.
— Кăçалхи кăрлач уйăхĕнче Чăваш Ене федераци бюджетĕнчен 569 миллион тенкĕ килчĕ. Кăрлачăн 26-мĕшĕ тĕлне çемьере çуралнă пĕрремĕш ачашăн пособи палăртма ыйтса 11 заявлени çырнă, вĕсенчен 7-шĕ укçана илнĕ. Пирĕн прогнозпа килĕшỹллĕн 2018 çулта ку тỹлеве 4,5 пин çемьерен кая мар илĕ, — пĕлтернĕ министр. Вăл ку тỹлеве адреслăн панине, ăна çемьери пĕр çын пуçне тивекен тупăш 13995 тенкĕрен иртменнисем тивĕçме пултарнине палăртнă.
Çак пулăшу мери пирки çемьесен пĕлмеллех. Мĕншĕн тесен ача çуралсан 6 уйăхран кая юлмасăр çак пособие пама ыйтса çырсан ашшĕ-амăшĕ пепке çут тĕнчене килнĕ кунранпах асăннă тỹлеве илме пултарать — пĕчĕкскер 1,5 çул тултаричченех. Ача çур çултан иртсен заявлени парсан вара — çав кунранпа çеç тỹлеççĕ.
— Çакна кашниех пĕлтĕр. Ку пулăшу çемьесемшĕн пĕлтерĕшлĕ, — пĕтĕмлетнĕ ларăва ЧР Пуçлăхĕ Михаил Игнатьев.
Кăрлачăн 30-мĕшĕ тĕлне пурĕ республикăра 21 çемьерен ыйту йышăннă. Вĕсенчен 7-шĕ тин çуралнă пĕрремĕш пепкешĕн пособие илме тытăннă.
С.ЕРОФЕЕВА,
Чăваш Енри Ĕçлев тата социаллă хỹтлĕх министерствин пресс-секретарĕ.
Сăн ỹкерчĕкре: телейлĕ çемье.
