Раççей Федерацийĕн Президенчĕ Владимир Путин 2020 çулхи мартăн 1-мĕшĕнче алă пусса çирĕплетнĕ саккунпа килĕшÿллĕн Тăван çĕршывăн Аслă вăрçинче Çĕнтерĕве çывхартма пысăк тÿпе хывнă хуласене «Ĕç мухтавĕн хули» хисеплĕ ят пама йышăннă.
Чăваш Ен тĕп хули ку енĕпе пысăк хастарлăх кăтартнă. Сăмахран, Совет Союзĕнче туса кăларнă мĕн пур танка Шупашкара эвакуаципе куçарнă электроаппарат завочĕн продукцийĕпе тивĕçтернĕ. Кунти ликерпа эрех заводĕнче вара «Молотов коктейлĕсене» хатĕрленĕ. Фронта пулăшса пурнăçланă ытти ĕç те курăмлă.
Чăваш Республикин Пуçлăхĕн ĕçĕсене вăхăтлăх пурнăçлакан Олег Николаев Шупашкара сумлă ят памашкăн ыйтса Раççейĕн «Çĕнтерÿ» йĕркелÿ комитетне тăратмалли документсене хатĕрлеме хушнă. «Пирĕн сумлă ятшăн кĕрешмешкĕн пĕтĕм сăлтав пур», – тенĕ Олег Алексеевич.
