Чăваш Республикинче «Вĕренÿ» наци проекчĕпе килĕшÿллĕн пурнăçланакан «Пуласлăха билет» платформăн виççĕмĕш тапхăрĕ старт илнĕ.
Вăл 6-11 классенче вĕренекенсене професси тĕнчипе паллаштарĕ.
Платформа 2018 çулта ĕçлеме тытăннă. Вăл виçĕ тапхăрпа иртет. Кăçалхи, виççĕмĕш, ачасене професси тĕнчипе малалла паллаштарасси онлайн мелпе пулса пырĕ.
Çапла июль вĕçĕнчен пуçласа çĕршыври кирек хăш ача та платформăра регистрациленсе професси суйласа илессипе çыхăннă интереслĕ ĕçе кÿлĕнме пултарать.
– Çак платформа ачасемпе çамрăксене хăш професси патне туртăм пуррине пĕлме тата профессие тĕрĕс суйласси пĕлтерĕшлĕ пулнине ăнланма пулăшать, – палăртнă «Молодые профессионалы» пĕрлешĕвĕн ачасемпе çамрăксене аталантаракан проектсене пурнăçлассипе ĕçлекен департаментĕнче.
Çак платформăпа Раççейĕн 78 регионĕнче усă курма май туса панă. Чăваш Ен те вĕсен шутĕнче. Пирĕн республикăри ачасемпе çамрăксем хăйсене хальлĕхе 26 тĕслĕ «ĕçре» тĕрĕслесе пăхма пултараççĕ.
Шкулта 6-11 классенче вĕренекенсем чи малтанах «Билет в будущее» платформăн сайтĕнче /https://bilet.worldskills.ru// регистрациленсе тест тĕрĕслевне тухмалла.
