Сăр тата Хусан енче окоп чавнă паттăрсене халалланă сайт ĕçлеме пуçланă. Сурскийрубеж.рф информаци ресурсĕнче тыл ĕçченĕсен паттăрлăхне кăтартакан истори докуменчĕсемпе, массăллă информаци хатĕрĕсем хатĕрленĕ видеосемпе тата хаçатра пичетленнĕ материалсемпе паллашма май пулĕ.
Хÿтĕлев линийĕсене тума хутшăннисем каласа панине «Герои» пая вырнаçтарнă. Сайта кашниех çакнашкал историсене сăн ÿкерчĕксемпе, документсемпе, видеосемпе пуянлатма пултарать. Чĕмсĕр чикĕ паттăрĕсене халалланă çулталăкра мĕнле мероприятисем иртессине те асăннă сайтра пĕлтерĕç.
