Олег НИКОЛАЕВ, Чăваш Республикин Пуçлăхĕ:
— «Пурăнмалли çурт-йĕр тата хула хутлăхĕ» наци проекчĕн тĕп тĕллевĕ — территорие хăтлăлатасси. Хăйсем пурăнакан вырăнсене хăтлăх кĕртес ĕçе граждансене явăçтарасси те пĕлтерĕшлĕ. Çулсерен Чăваш Енре 20 ытла общество анлăшĕ илемленет. Пĕтĕмĕшле илсен 2019 çултанпа 209 территорие тирпей-илем кĕртнĕ. Ку шутран 166-шĕ — общество, 43-шĕ — çурт-йĕр хутлăхĕ.
«Пурăнмалли çурт-йĕр тата хула хутлăхĕ» наци проекчĕ тĕпрен илсен çынсене çурт-йĕрпе тивĕçтерессине лайăхлатас, халăх пурăнакан вырăна тирпейлĕхпе хăтлăх кĕртес енĕпе тимлет. Вăл «Ипотека», «Пурăнмалли çурт-йĕр», «Хăтлă хула хутлăхĕ», «Пурăнма юрăхсăр çурт-йĕр шутне чакарасси», «Таса шыв» проектсемпе ĕçлет.
Пирĕн округра та çак проектсене пурнăçласа кашни çул чылай ĕç туса ирттереççĕ. «Çамрăк çемьесене пурăнмалли çурт-йĕрпе тивĕçтересси» программăпа кăçал 4 çемьене — Елчĕкри Анастасия тата Алексей Лебедевсене, Яманчỹрелĕнчи Валентина тата Владислав Карсаковсене, Лаш Таяпари Тайпи тата Николай Сорокинсене, Курнавăшри Татьяна тата Виктор Веселинсене свидетельствăсем панă. Ялта пурăнакан пĕр çын — «Комбайн» ЯХПК ĕçченĕ — Владимир Васильев (Питтĕпел) «Ял территорийĕсене комплекслă аталантарасси» программăпа çурт-йĕр туянма пулăшу илнĕ. «Ипотека» программăпа 4 тăлăха — Аслă Пăла Тимешри Андрей Капустина, Вырăскассинчи Анита Яковлевăна, Сăрьелĕнчи Рамиль Ахметзянова тата Çĕнĕ Пăвари Никита Пронина, нумай ачаллă 2 çемьене — Кĕçĕн Шăхалĕнчи Ольга Ильинăна тата Ирина Федоровăна сертификатсемпе тивĕçтернĕ. Чăваш Республикин «Нумай ачаллă çемьесене çĕр лаптăкĕсемпе тивĕçтересси» саккунне пурнăçласа чылайăшне çĕр лаптăкĕсем уйăрса панă.
«Хăтлă хула хутлăхĕ» программăпа округ центрне хăтлăх кĕртнĕ, ялсенче, урамсенче, нумай хутлă çуртсен картишĕсенче, социаллă-культурăллă объектсен çывăхĕнчи лаптăксенче тирпей-илем тăвассипе сахал мар ĕç пурнăçланă.
«Пурăнмалли çурт-йĕр тата хула хутлăхĕ» наци проектне пурнăçлас тесе округра 2025 çулта та калăпăшлă ĕçсем палăртнă.
