Таяпа Энтри ялĕнче пурăнакан Николай Петрович Петров 90 çулхи юбилейне кĕтсе илнĕ.
Ĕç ветеранне Кĕçĕн Таяпа территори пайĕн начальникĕ Лариса Ильина, округри ĕçпе вăрçă ветеранĕсен Канашĕн председателĕ Елена Петрова тата Кĕçĕн Таяпари культура çурчĕпе библиотека ĕçченĕсем саламланă.
Н.Петров каçхи вăтам, Канашри механизаци, Шупашкарти советпа парти шкулĕсене пĕтернĕ. Нумай çул «Смычка» колхозра трактористра вăй хунă, сухаçăсен районти ăмăртăвĕнче çĕнтерсе алла çыхмалли сехете тивĕçнĕ тата райпоран çăмăл автомашина черетсĕр туянма ирĕк илнĕ.
Унтан Кĕçĕн Таяпари ял Канашĕнче, Чкалов ячĕллĕ хуçалăхра бригадирта, Таяпа Энтри шкулĕнче трактор вĕрентекенĕнче ĕçленĕ. Пархатарлă ĕçшĕн ăна «Ĕçре палăрнăшăн. В.И.Ленин çуралнăранпа 100 çул çитнĕ май» медальпе, «Коммунизмла ĕç ударникĕ» паллăпа чысланă.
Николай Петровичпа Ольга Григорьевна нумаях пулмасть çемье çавăрнăранпа 65 çул çитнине паллă тунă. Вĕсем виçĕ ачана пурнăç парнеленĕ.
