Елчĕкри тĕп вулавăшра Кушкă ялĕнче çуралса ỹснĕ, халĕ Шупашкар хулинче пурăнакан паллă журналистăн, художникăн, режиссерăн Владимир Петрович Галошевăн «Аслă Пăла тăрăхĕнчи вунă ял» черетлĕ кĕнекин хăтлавĕ иртрĕ.
Тĕл пулăва Владимир Галошев автор, округри тавра пĕлỹçĕсем, вулавăш ĕçченĕсем, чăваш чĕлхи учителĕсем хутшăнчĕç.
Кĕнекере Аслă Пăла Тимеш тăрăхĕнчи 10 ял çинчен каласа панă. Вунă ял пĕр-пĕринпе питĕ тачă çыхăнура. Совет Союзĕ вăхăтĕнче 30 çул ытла вĕсем «Победа» ял хуçалăх пĕрлешĕвĕнче пĕрле пулнă. Ялсем Аслă Пăла юхан шывĕ тавра вырнаçнă. Çавăн пекех çак кĕнеке 10 ялăн историллĕ пулăмĕсем, паллă вырăнĕсем тата таврари çынсем çинчен каласа парать.
Кĕнеке хатĕрленĕ чухне автор архив докуменчĕсемпе, тавра пĕлỹ материалĕсемпе, аса илỹсемпе, фотоальбомсемпе, Аслă Пăла Тимеш тăрăхĕнче пурăнакансем каласа панисемпе усă курнă.
Кĕнекене сỹтсе явнă май Илья Трофимов, Владимир Плотников, Анатолий Тимофеев тата ыттисем те Владимир Галошев ĕçĕ пуян пулнине, кĕнеке шкулсенче тăван ен культурине, историне вĕрентекенсемшĕн усăллă пулнине палăртрĕç. Ку кĕнеке Аслă Пăла Тимеш тăрăхĕнче пурăнакан кашни çын сĕтелĕ çинче пулма тивĕçлĕ.
Владимир Петрович хăйĕн малашнехи шухăш-ĕмĕчĕсемпе те паллаштарчĕ, ыйтусем çине хуравларĕ.
Светлана САЙКИНА, библиотекарь.
