Чăваш Республикинчи Ача прависем енĕпе ĕçлекен уполномоченнăй Алевтина Федорова округра ĕçлĕ визитпа пулнă май Елчĕкри Н.А.Петров Раççей Геройĕ ячĕллĕ вăтам шкула та чарăннă.
Алевтина Николаевна вĕренекенсен апатланăвне мĕнле йĕркеленине тĕрĕсленĕ. Ăна кунта централизациленĕ. Çапла туни пахалăхсăр апат-çимĕç тăратассинчен хăтарать — продукципе вырăнти тавар туса кăларакан шанчăклă организацисем тивĕçтереççĕ.
Ачасем кăмăлпа çỹреççĕ столовăйне. Кунта таса, тирпейлĕ, тутлă çитереççĕ. Апата менюпа килĕшỹллĕн хатĕрлеççĕ. Хăш-пĕр ачасене уйрăм кирлĕлĕхе шута илсе апатлантарассине те йăлана кĕртнĕ.
Шкулта ашшĕ-амăшĕпе çирĕп çыхăну. Обществăлла комиссисем кашни вĕренỹ чĕрĕкĕнче шкулта пулса кунти ĕç-хĕлпе паллашасси çĕнĕ пулăм мар. Çав шутра ачасен апатланăвĕ тĕлĕшпе те.
Алевтина Федорова тĕрĕслев ĕçĕпе кăмăллă юлнă, çитменлĕхсем асăрхаман. Малашлăхра вĕренекенсене пахалăхлă апатпа тивĕçтерес ыйтупа округри шкулсен ертỹçисен тата столовăйсен ĕçченĕсен пĕрлехи вĕренỹ семинарĕсене ирттерме сĕннĕ.
