Лаш Таяпари В.В.Андреев ячĕллĕ пĕтĕмĕшле пĕлÿ паракан вăтам шкулта 142 ача вĕренет. Пирĕн шкулти вĕренекенсем кашни çулах Пĕтĕм Раççейри предмет олимпиадисене тĕплĕн хатĕрленсе тĕрлĕ призлă вырăнсем йышăнаççĕ.
Юлашки икĕ çул хушшинче муниципалитет, регион шайĕнчи олимпиадăсенче ытларах Ираида Павлова педагогăн вĕренекенĕсем биологи, хими предмечĕсемпе призлă вырăнсем йышăнчĕç. Иртнĕ вĕренÿ çулĕнче Ираида Николаевнăн сакăр вĕренекенĕ районти олимпиадăра биологи тата экологи предмечĕсемпе çĕнтерÿçĕпе призерсен, Татьяна Воронина вĕрентекен 7 класри Мария Абдулкина литература предмечĕпе призерсен йышне кĕме пултарчĕç.
Кăçалхи ÿсĕмсемпе те савăнмалăх пур. Элла Немцева /11кл./, Мария Михеева /9 кл./ биологипе çĕнтерÿçĕсен, Марина Волкова /11 кл./, Руслан Петров /10 кл./, Виктория Маркова /9 кл./ призерсен йышне кĕчĕç. Мария Михеева экологипе те палăрчĕ. Марийăпа Элла регион шайĕнчи предмет олимпиадисене хастар хутшăнчĕç. Мария Михеева биологи тата экологи предмечĕсемпе призер пулса тăчĕ.
Иртнĕ вĕренÿ çулĕнче Элла Немцева экологипе республика тата район чысне Раççей шайĕнче хÿтĕлерĕ.
Сăмах май каласан, Ираида Павлова Раççей шайĕнчи призерсене пĕрре мар хатĕрленĕ. 2010 çулта Алексей Павлов биологипе, 2015 çулта Андрей Павлов экологипе Пĕтĕм Раççейри олимпиадăн юлашки тапхăрĕнче малтисен йышĕнче пулса шкул чысне çÿле çĕклерĕç. Эпир Ираида Николаевна пек пур енлĕ пултаруллă, аслă категориллĕ учительпе ĕçлеме тÿр килнĕшĕн савăнатпăр.
И.ЛЕОНТЬЕВА.
Сăн ÿкерчĕкре: Ираида Павлова вĕрентекен Элла Немцева тата Мария Михеева вĕренекенсемпе.
