Олег НИКОЛАЕВ, Чăваш Республикин Пуçлăхĕ:
— Чăваш Ен — аграри регионĕ, республикăри кашни виççĕмĕш çын ялта пурăнать. Çавăнпа та ял хуçалăхĕн сферинче предпринимательĕхе аталантарасси уйрăмах пысăк пĕлтерĕшлĕ. Чăваш Республикин ертỹлĕхĕн тата бизнес-пĕрлĕхĕн юлашки вăхăтри пĕрлехи ĕçĕ-хĕлĕ тухăçлăхне кăтартрĕ. Пĕчĕк тата вăтам предпринимательлĕх субъекчĕсем валли палăртнă патшалăх пулăшăвĕн мерисем çулсерен анлăланаççĕ, налук, ытти енĕпе çăмăллăх парасси вăй илсе пырать.
Чăваш Республикин Министрсен Кабинечĕн Председателĕн çумĕ — ял хуçалăх министрĕ Сергей Артамонов округ администрацийĕн пуçлăхĕпе — Леонард Левыйпа тата округ администрацийĕн ял хуçалăхĕпе экологи пайĕн начальникĕпе — Сергей Волковпа пĕрле иртнĕ эрнере Елчĕк муниципалитет округĕнче ĕçлĕ çул çỹревпе пулнипе усă курса Кĕçĕн Таяпари Александр Викторов предпринимателĕн пуçаруллă ĕçĕ-хĕлĕпе тата Николай Головин ертсе пыракан «Победа» ОООра пурнăçлакан черетлĕ пысăк объектри ĕçсене мĕнле йĕркеленипе паллашни ахальтен пулман…
Александр Викторов, кĕçех унтанпа 5 çул çитет, иртнĕ ырă вăхăтри «Таябинка» хуçалăхăн юхăннă ферминчи объекта реконструкци туса выльăх пусса тирпейлемелли цех хута ярса ăна ăнăçлă ĕçлеттернине нумайăшĕ лайăх пĕлеççĕ. Мĕн тунипе анчах лăпланса ларма хăнăхман çамрăк çĕр çырли туса илессипе те тимлет. Сергей Артамонов палăртнă тăрăх, хальхи вăхăтра регионра çырла туса илесси малашлăха шантаракан пĕлтерĕшлĕ ĕç шутланать. Мĕншĕн тесен çĕршывра çырла сахал туса илеççĕ, çак вăхăтченех ăна 75 процент чухлĕ урăх çĕшывсенчен кỹрсе килнĕ пулнă. Апла пулсан, министр шучĕпе, çырла туса илни усăллă пулмалла. Округри ялсенче пурăнакан ытти мал ĕмĕтлĕ çамрăксен те мĕншĕн çак ырă пуçарăва ăса хывас мар? Хальхи вăхăтра пĕчĕк тата вăтам бизнес мĕн пур сферăра, çав шутра агропромышленность комплексĕнче те тарăн тымар ячĕ. Наци проекчĕсемпе патшалăх программисем бизнеса аталанма çул уçрĕç тейĕн.
Александр Викторов хальлĕхе çак ĕçсене пурне те хăй укçипе тунă. Анчах малашлăхри ĕмĕчĕсем пысăк унăн: май пур чухне патшалăхран уйăракан тĕллевлĕ укçа-тенкĕпе мĕншĕн усă курас мар?
Унăн 5 çул каяллах пикеннĕ ĕçне те халĕ тивĕçлĕ хак пама пулать ĕнтĕ. Халăха экологи тĕлĕшĕнчи таса продуктсемпе тивĕçтерессине малти вырăна хураççĕ кунта. Хулари лавккасенче те сутакан вĕсен аш-пăшне халăх яланах хапăл туса туянать.
«Победа» ООО та республикăра пархатарлă ĕçĕ-хĕлĕпе палăракан ял хуçалăх предприятийĕсен ретĕнче: экономика кăтартăвĕсемпе те, çĕнĕлĕхсене алла илессипе те пуçаруллă вĕсем. Ферма территорийĕнче выльăх-чĕрлĕх витисем çулсерен кăмпа пек ỹссе пыраççĕ тейĕн кунта. 360 пуç пăру вырнаçмалли вите никĕсне те кĕске вăхăтра туса çирĕплетнĕ. Кĕркунне тĕлне вăл выльăхсене йышăнма хатĕр пулмалла.
Сергей Артамонов май пулнипе усă курса «Эмметево» ОООра тата «Прогресс» АХОра выльăх апачĕ хатĕрлес ĕç мĕнле пынипе паллашнă.
