Янкăр тÿпеллĕ, хĕвеллĕ те ăшă Пукрав кунĕ Çĕнĕ тата Кивĕ Арланкассипе Энтепе ялĕсенче пурăнакансемшĕн пысăк та савăнăçлă уявпа асра юлĕ – шăпах çак кун Çĕнĕ Арланкассинче модульлĕ çĕнĕ фельдшерпа акушер пункчĕ уçăлчĕ.
Кунта пурăнакансен савăнăçне пĕрле пайлама район администрацийĕн пуçлăхĕн тивĕçĕсене вăхăтлăх пурнăçлакан Леонард Левый, ЧР Министрсен Кабинечĕн Председателĕн çумĕ – вĕренÿпе çамрăксен политикин пайĕн министрĕн тивĕçĕсене пурнăçлакан Алла Салаева, сывлăх сыхлавĕн министрĕ Владимир Степанов, ЧР Патшалăх Канашĕн депутачĕ Петр Краснов, районти тĕп больницăн тĕп тухтăрĕ Надежда Уркова килсе çитрĕç. Сумлă хăнасем «Сывлăх сыхлавĕ» наци проекчĕпе килĕшÿллĕн республикăри инçетри ялсенче хальхи йышши ФАПсем çĕкленни патшалăх ял çыннисен сывлăхĕшĕн тимлессине, халăха кÿрекен медицина пулăшăвĕн пахалăхлăхне лайăхлатсах пырассине тĕп вырăна хунине палăртнă май пухăннисене уяв ячĕпе саламларĕç, малашне ял çыннисем медицина профилактикин тĕрĕслевĕсем витĕр вырăнтах, хăтлă та çутă, çĕнĕ оборудованиллĕ ФАПра, тухма пултарнине палăртрĕç. Маларах асăннă программăпа туса лартнă районти 13-мĕш фельдшерпа акушер пункчĕ вăл.
Ку тăрăхра пурăнакансем халĕччен пĕрремĕш пулăшу илме 1977 çулта туса лартнă медицина пунктне çÿренĕ. Çурчĕ кивелнĕччĕ, юхăннăччĕ, сивĕччĕ вăл, санитари нормисене тивĕçтерместчĕ… Çак медпункт вырăннех çĕнĕ ФАП тума пуçлаççĕ тенине илтсенех ял халăхĕ кар çĕкленнĕ: киввине кĕске вăхăтра пăсса çĕннине тума вырăн йĕркеленĕ, территорине тирпей-илем кĕртнĕ. Çапла вара Патăрьелĕнчи «Каскад» сахал яваплă обществăн рабочийĕсем кĕске вăхăтра сывлăх сыхлавĕн çуртне хăпартса та хунă.
Уява малалла тăсса Аслă Пăла Тимеш ял тăрăхĕн пуçлăхĕн тивĕçĕсене вăхăтлăх пурнăçлакан Ольга Тихонова кĕске вăхăтра çĕкленсе ларнă фельдшерпа акушер пункчĕн территорине тирпей-илем кĕртнĕ çĕрте ял çыннисем тăрăшса ĕçленине, ял тăрăхĕн администрацийĕ шыв кĕртнĕ, канализаци кăларнă çĕрте укçа-тенкĕ уйăрнине палăртрĕ, кунти пенсионерсен канашне ертсе пыракан Николай Александрова Тав хучĕ парса чысларĕ. Николай Иванович ял халăхĕ ячĕпе республика, район ертÿçисене тав турĕ. ФАП аслă çул хĕрринче вырнаçнăран кунта кирек мĕнле çанталăкра та кĕрсе тухма меллĕ.
Палăртма кăмăллă: ял хастарĕн пуçарулăхĕпе çак ырă пулăма тата Аслă Çĕнтерÿ тунăранпа 75 çул çитнине халалласа ФАП çумĕнче 75 тĕп чăрăш лартса хăварнă.
Унтан Галина Александрова медсестрана «Каскад» строительство организацийĕн ертÿçи Асгат Куртлюков çĕнĕ çуртăн символла çăрине пачĕ. Хăнасемпе пухăннисем фельдшерпа акушер пункчĕпе тĕплĕнрех паллашрĕç, кунта пĕрремĕш пулăшу илмелли мĕнпур майсем пуррине курса ĕненчĕç. 400 яхăн çыннăн сывлăхне сăнаса-тĕрĕслесе тăрĕ Галина Петровна заведующи.
Савăнăçлă мероприятие уçнă çĕре ку тăрăхра пурăнакансем йышлăн пуçтарăннă. Вĕсен савăнăçĕ куç тулли. Уява Лаш Таяпари культура ĕçченĕсем, ялти фольклор ушкăнне çÿрекенсем илемлĕ юрă-кĕвĕпе илем кÿчĕç. Хăнасем кайсан та пуçтарăннисем килелле тÿрех васкамарĕç, кĕрхи кун хитрелĕхĕнче янăракан купăс сассин илемĕпе киленчĕç.
В.КИРИЛЛОВА.
Сăн ÿкерчĕкре: Г.Александрова çăра уççине алла илнĕ май пурне те ФАПа йыхравлать.
