Çак кунсенче Çирĕклĕ Шăхальти вăтам шкулта 1-2 классенче вĕренекенсем Шупашкар хулинчи пуканесен театрĕнче пулчĕç. Ăнсăртран мар. Иккĕмĕшсем шкул театрĕнче хăйсен ăсталăхне туптаççĕ. В.Митрофанова вĕрентекен ертсе пынипе вĕсем кăçалхи вĕренỹ çулĕнче икĕ спектакль хатĕрлесе сцена çине кăларма та ĕлкĕрчĕç. Çамрăк артистсен пултарулăхне шкул ачисемпе вĕрентекенсем, ашшĕ-амăшĕ курса хакларĕç.
Пуш уйăхĕн 27-мĕшĕ — театр кунĕ. Çавна май шкул директорĕн воспитани енĕпе ĕçлекен советникĕ Г.Чернова ачасене «Снежная королева» спектакль курма кайма сĕнсен, вĕренекенсем пĕр тăхтаса тăмасăрах килĕшрĕç.
«Навигаторы детства» проектăн республикăри кураторĕ Н.Иванова йĕркеленипе театр ĕçченĕсем тĕрлĕ мастер-классем ирттерчĕç. Ачасем тĕрлĕ пуканесемпе, актер ĕçĕ-хĕлĕн вăрттăнлăхĕсемпе паллашрĕç.
— Пуканесен театрĕнче пулса курни вĕренекенсене тата вĕрентекенсене килĕшрĕ. Кунта хамăр та пĕрремĕш хут пултăмăр, — хыпарларĕ пĕрремĕшсен ертỹçи О.Мясникова.
Галина ЧЕРНОВА.
