Елчĕкри тĕп больницăра çулсеренех аслă вĕренỹ заведенийĕсемпе колледжсенчи студент-медиксем практикăра пулаççĕ.
Сывату учрежденийĕнче анестезиологипе реаниматологи, педиатри, терапи, хирурги профилĕсем никĕсленнĕрен те практикантсем çулла йышлăн килеççĕ кунта. Пулас сывлăх хуралçисем 1-мĕш курс хыççăнах теори пĕлĕвĕсене специалистсен практикăлла опычĕпе пуянлатаççĕ.
И.Н.Ульянов ячĕллĕ Чăваш патшалăх университечĕн 4-мĕш курс студенчĕсем — Владимир Леонтьевпа Мария Ефимова хăйсен кăмăл-туйăмне пытараймарĕç:
— Обходра пациентсене тĕрĕсленĕ тапхăра хутшăнтăмăр, анализсен кăтартăвĕсене хакларăмăр, диагноз лартма та тăрăшрăмăр.
Пиллĕкмĕш курс студенткине Дарья Спиридоновăна нумайăшĕ пĕлеççĕ ĕнтĕ. Чăваш Енри «Волонтер-медиксем» обществăлла организацин регионти координаторĕн çумĕ хăйне лайăх енчен кăтартма ĕлкĕрнĕ. «Сиплев ĕçĕ» специальноçа алла илме хатĕрленекенскер, тĕп больницăнах ĕçлеме килес кăмăллă, мĕншĕн тесен вăл тĕллевлĕ направленипе вĕренет.
Антонина АЛЕКСАНДРОВА.
