Апрелĕн 25-мĕшĕнче Чăваш Енре пурăнакансем тата республика тулашĕнче тĕпленнĕ йăхташсем Чăваш чĕлхи кунне паллă тунă.
Çавна май ЧР Правительство çуртĕнче «Тăван чĕлхе наци культурине упраса хăвармалли хатĕр» темăпа «çавра сĕтел» иртнĕ.
Республика ертÿçин тивĕçĕсене вăхăтлăх пурнăçлакан Олег Николаевăн ВКонтакте тата YouTube каналти страницисенче тÿрĕ эфира тухнăран мероприятие Иван Яковлев çуралса ÿснĕ тăрăхри тата Константин Ивановăн тăван ялĕнчи йăхташсем те итлеме пултарнă. Онлайн-конференцие хутшăннă ăсчахсене, вĕрентекенсене, наци культурине, чĕлхине, йăли-йĕркине тĕпчес, сыхласа хăварас тĕлĕшпе ĕçлекен организацисен ертÿçисене саламланă май Олег Николаев хальхи «çавра сĕтел» питĕ пĕлтерĕшлĕ пулнине палăртнă. Олег Алексеевич 2018 çулта тăван чĕлхе çинчен калакан саккунпа ĕçленине те аса илнĕ.
Мероприятие пĕтĕмлетнĕ май Олег Николаев чăваш чĕлхине упраса хăварас ĕçе пысăк тÿпе хывакан вĕрентекенсене, ăслăлăх ĕçченĕсене чăваш автономийĕн 100 çулхи юбилейĕ тĕлне хатĕрленĕ медальпе чысланă.
