Хушма хуçалăхри выльăх-чĕрлĕхе маркировка тăвасси малалла пырать.
2024 çулхи пуш уйăхĕн 1-мĕшĕнчен пуçласа выльăх-чĕрлĕхе шута илмелли çĕнĕ йĕрке вăя кĕрет. РФ Правительстви çак йĕркене 550-мĕш номерлĕ постановленипе килĕшỹллĕн çирĕплетнĕ.
Ку чухне тĕрлĕ выльăха (лаша, тĕве, пыл хурчĕсем, сысна, сурăх-качака, килти чăх-чĕп, кролик тата ыт. те) уйрăммăн е ушкăнпа маркировка туса (хăлхисем çине бирка çапаççĕ) шута илеççĕ.
РФ ветеринари законодательствипе килĕшỹллĕн маркировка туни выльăха е чĕр чуна шута илме анчах мар, вĕсене хăш тăрăхран илсе килнине пĕлме, çапла майпа ерекен хăрушă чирсен инфекцийĕсен çăл куçĕсене тупса палăртма тата чир-чĕртен асăрханма май парать.
Хальхи вăхăтра ветеринари специалисчĕсем шăпах тĕрлĕ выльăх-чĕрлĕхпе чĕр чуна биркăлас — информаципе автоматизаци тытăмĕн учетне илессишĕн тата тỹлевсĕр регистраци тăвас ĕçе тивĕçлипе йĕркелесе пырассишĕн тимлеççĕ.
