Юлашки çулсенче конкурссене тĕрлĕ форматпа ирттерме пуçларĕç. Çав шутра — карас телефон сасăлавĕпе те.
Çĕртме уйăхĕнче регион шайĕнче «Эпĕ — хĕрарăм» конкурс иртрĕ. Унта округран кăна 26 çын хутшăннă. Вĕсем малтан конкурс материалĕсене тăратнă, унтан рейтинга кура сасăлава кĕртнĕ. Вара пуçланнă «Маншăн сасăла-ха…», — тени. Эпир те, паллах, юлман асăннă процесран.
Конкурсантсем пирки мар сăмах. Чылайăшне пĕлетĕп — пурте пултаруллă. Çапах та эпир вĕсен материалĕсене пачах курман вĕт, мĕнле хаклар? Суккăр куçпа пăхни мар-и?
«Эпĕ — хĕрарăм» конкурсăн пĕтĕмлетỹ шавĕ лăпланманччĕ, тепри пуçланчĕ: «Паттăрсен вăхăчĕ». Ку вара Атăлçи федераци округĕн шайĕнчиех. Кĕсье телефонĕпе усă курсах тĕрлĕ сферăри «паттăрсене» палăртмаллаччĕ. Кунта та ĕçре, обществăра хастарлăхпа палăрнисем, хисеплĕ ятсене тивĕçнисем сахаллăн мар. Çавна май пĕр ентешшĕн кăна мар кнопкăсене пуснă-ха эпир. Çапах та камăн сасăлав «конвеерĕ» тухăçлăрах ĕçлет, çав çĕнтеретех.
Тепĕр тесен, паттăрсем халь ятарлă çар операцийĕнче. Кунта çырни нимĕн те улăштараймĕ. Апла пулин те, телефон сасăлавĕпе çакнашкал конкурссем йĕркелени пачах тĕрĕс мар тесе шутлатăп. «Голос» мар вĕт ку…
Н.ГАВРИЛОВ.
