Çула çитмен çамрăксене пĕр чăмăра пĕрлештерсе куçа-куçăн тĕл пулма майсем туса парас, ку чухне вĕсене пурнăçри тĕрлĕрен ыйтусене уçăмлатма пулăшас тĕллевпе округри тĕп библиотека никĕсĕ çинче чылайранпа «Место силы» центр ĕçлет. Çак тапхăрта кунта чылай асра юлмалла мероприяти йĕркелесе ирттерме пултарни пушшех савăнтарать.
Черетлĕ тĕл пулу Елчĕк округĕн прокурор пулăшаканĕпе — Денис Остряковпа иртрĕ. Унта Елчĕкри Н.А.Петров Раççей Геройĕ ячĕллĕ пĕтĕмĕшле пĕлỹ паракан вăтам шкулти вуннăмĕшсене — кадет класĕнче вĕренекенсене чĕнтĕмĕр.
Прокурор пулăшаканĕнчен хальхинче пурнăçра питех те кирлĕ ыйтусем — уголовлă тата административлă право йĕркисем çинчен ăнлантарса пама ыйтрăмăр. Мĕншĕн тесен, пытармалли çук, çула çитмен çамрăксенчен нумайăшĕ уголовлă тата административлă айăплав йĕркисем çинчен пĕлсех каймаççĕ. Пĕлменни вара преступлени çулĕ çине илсе çитерме те пултарать. Денис Остряков шăпах ыйтусем çинче тĕплĕн чарăнса тăчĕ. Пĕр сăмахпа, тĕл пулу кăсăклă иртрĕ. Вĕренекенсен ыйтусем те нумай пулчĕç, вĕсем пурин çине те татăклă хуравсем илчĕç.
Диана ВАСИЛЬЕВА, тĕп библиотекăри право центрĕн заведующийĕ.
