Иртнĕ кунсенче васкавлă пулăшăвăн авиамедицина бригади 49 çулти пациента Улатăртан Шупашкара илсе çитернĕ.
Алексей Белов 2022 çулхи çу уйăхĕнчех хăйне япăх туйма пуçланă. Ырату ăш-чикпе çыхăннă пулĕ тесе шутланă вăл. Мăшăрĕ васкавлă пулăшăва чĕнсе илет. Тухтăрсем диагноз лартаççĕ: инфаркт. Вĕсем икĕ хутчен çĕнĕрен ĕçлеттерсе янă унăн чĕрине. Ун хыççăн çийĕнчех вертолетпа тĕп хулана ăсатнă. Кун пек чухне сывлăшпа куçарса килни — чи ăнăçлă меслет.
Пуçламăш медицина пулăшăвĕ кỹресси «Сывлăх сыхлавĕ» наци проекчĕ пулăшнипе аталанса пырать. Йывăр пациентсене вертолетпа турттарма кашни çулах ятарласа укçа-тенкĕ уйăраççĕ. Кăçал çакна валли 36 миллион тенке яхăн уйăрнă пулнă. Çулталăк пуçланнăранпа санавиаци вертолечĕ 54 хутчен çула тухса пациентсене республика больницисене илсе çитернĕ.
