Чăваш Республикинчи Ача прависем енĕпе ĕçлекен уполномоченнăй Алевтина Федорова тата муниципалитет округĕн пуçлăхĕн тивĕçĕсене вăхăтлăха пурнăçлакан Марина Павлова юнкун пулса иртнĕ Пĕрлехи информаци кунĕнче муниципалитет округĕн администрацийĕнче тата культура ĕçченĕсемпе тĕл пулнă май кун йĕркинчи тĕп ыйтусене — пуçару бюджечĕн программипе килĕшỹллĕн ĕçе кĕрекен проектсем, ГТО нормативĕсене пурнăçлани тата предпринимательлĕхе аталантарма патшалăх енчен уйăракан тĕллевлĕ пулăшу тĕсĕсем пирки сỹтсе яврĕç.
Юлашки çулсенче Елчĕк тăрăхĕнче пурăнакансем ял территорийĕсене аталантарма уйăракан пуçару бюджечĕн программипе анлăн усă курма пуçларĕç. Çакă чи малтанах халăх тăван тавралăх тирпейлĕхĕпе хăтлăхĕшĕн тăрăшнипе çыхăннă.
— Муниципалитет округĕнче кăçал, пĕлтĕрхипе танлаштарсан, ытларах (пурĕ — 81, 84 653,1 пин тенкĕлĕх) проект пурнăçа кĕртетпĕр. 2025 çул валли патшалăх порталĕ урлă сасăлама 104 проект тăратнă.
Заявкăсене хатĕрленĕ чухне эпир мĕн пур майпа туллин усă курассине тĕпе хунă. Тĕллевлĕн уйăракан укçа-тенке пĕтĕмпех округа илсе килме, унпа хамăра ытларах кирлĕ ĕçсене (ялсенче çулсем ытларах тумалла, шыв башнисене улăштармалла, культура учрежденийĕсене çĕнетмелле, картишсене тирпей-илем кĕртмелле…) тунă чухне усă курма палăртатпăр. Çак ĕçсене пурнăçлани пирĕн пурнăçа тата лайăх енне улăштарма, хăтлăрах, меллĕрех тума май парĕ, — терĕ Марина Николаевна.
2025 çул валли проектсене суйласа илессинче çĕнĕлĕх кĕртнĕ. Конкурс докуменчĕсене «Чувашия онлайн» информаци тытăмне кĕртмелле. Проектсем миçешер балл пухнине, унта çĕнтернисене те программа автомат урлă пĕтĕмлетсе парать. Çĕнĕ йĕрке программăна пурнăçа кĕртме ялсенче пурăнакансем хăйсем мĕн чухлĕ укçа хывнине шута илме те хистет.
«Чăваш Республикинчи экономика аталанăвĕ» программăпа килĕшỹллĕн бизнеса аталантарас тĕлĕшпе патшалăх енчен 12 тĕрлĕ пулăшу мери çирĕплетнĕ. Бизнес пĕрлĕхĕнче патшалăх пулăшăвĕпе усă курас текенсем республикăра, çав шутра пирĕн округра та хушăнсах пыраççĕ. Çакă — ырă пулăм.
Алевтина Федорова отчетлă тапхăрти предпринимательлĕх ĕç-хĕлне пĕтĕмлетнин кăтартăвĕсем çинче чарăнса тăчĕ. Кăçалхи 9 уйăхра Чăваш Енре предпринимательсен йышĕ ỹснĕ. Пĕрлĕхлĕ реестрта 46256 юридици сăпачĕ тата 13027 харпăр хăй предприниматель регистрациленнĕ. Кăçалхи çур çулта регионти пĕчĕк тата вăтам предприятисем 781 миллион тенкĕлĕх микрофинанс пулăшăвĕ илнĕ. Ку кăтартупа Чăваш Ен çĕршывра 4-мĕш вырăн йышăнать.
Сывă пурнăç йĕркине çирĕплетес тĕллевпе федераци шайĕнче пурнăçланакан «Демографи» наци проекчĕпе килĕшỹллĕн ГТО нормативĕсене пурнăçласси çирĕп йăлана кĕчĕ. Елчĕк муниципалитет округĕ ку енĕпе темиçе çултанпах лайăххисен шутĕнче пулнине пĕлетпĕр. Шăпах меллĕ пулчĕ те: ГТО нормативĕсене пурнăçланă округ администрацийĕн ĕçченĕсене май пулнипе усă курса ылтăн, кĕмĕл тата бронза паллисене пачĕç.
Иформаци ушкăнĕн членĕсем Аслă Елчĕк ялĕнче те пулса курчĕç (сăн ỹкерчĕкре), кунта пуçару бюджечĕн программипе пурнăçланă ĕçсемпе паллашрĕç. Ун хыççăн Алевтина Федорова муниципалитет округĕн администрацийĕнче граждансене хăйсен ыйтăвĕсемпе йышăнчĕ.
Светлана АНАТОЛЬЕВА.
