Сентябрĕн 1-мĕшĕнчен çĕршывра «Пушкин картти» программа старт илнĕ. Ăна РФ Президенчĕн Владимир Путинăн пуçарăвĕпе çамрăксене культура учрежденийĕсене çÿреме майсем туса парас тĕллевпе ĕçе кĕртеççĕ.
«Пушкин картти» – çамрăксем валли хатĕрленĕ ятарлă банк картти. Ăна 14-22 çулсенчи граждансене параççĕ. 2021 çулта карта балансĕ çинче – 3 пин тенкĕ, 2022 çулта 5 пин тенкĕ пулĕ. ЧР культура министрĕ Светлана Каликова пĕлтернĕ тăрăх, укçана культура мероприятийĕсемшĕн кăна тăкаклама юрать. Карттăна музейре, театрта, концерт залĕнче, филармонире, «Пушкин картти» проекта хутшăнакан ытти культура учрежденийĕнче билет туяннă чухне ятарлă терминал, вĕсене «шурă терминал» теççĕ, тÿлемелле.
Карттăна хатĕрлеме ыйтса çырнă заявкăсене Патшалăх пулăшу ĕçĕсен пĕрлехи порталĕнче сентябрĕн 1-мĕшĕнчен йышăнаççĕ. Мероприятисен афишипе «PRO.Культура.РФ» порталта тата Патшалăх пулăшу ĕçĕсен пĕрлехи порталĕнчи «Культура» хушăмра паллашма пулать.
Программăна Чăваш Республикинчи 12 культура учрежденийĕ хутшăнать. 140 ытла культура мероприятийĕ порталта регистрациленнĕ. «Пушкин картти» программăна Чăваш Енри 14-22 çулсенчи 105 пин ытла çыннăн хутшăнма май пур. Çулталăк вĕçлениччен вĕсем культура мероприятийĕсене çÿресе 3 пин тенкĕ тăкаклама пултараççĕ.
– Çĕршыв Президенчĕ çакăн пек йышăну туни чăннипех те савăнтарать, – тенĕ Чăваш Ен Пуçлăхĕ Олег Николаев. – Çынсене кашнине уйрăммăн çапла майпа пулăшни культура учрежденийĕсене те самаях пысăк тĕрев парать. Пирĕн тĕллев – çак майсемпе туллин усă курасси, çамрăксене тивĕçлĕ культура воспитанийĕ парасси, тăван çĕре, халăха юратма, ырă йăла- йĕркене хисеплеме вĕрентсе ÿстересси.
Çакна та палăртмалла: «Пушкин карттипе» Чăваш Енри культура учрежденийĕсене кăна мар, Раççейри ытти хулари театрсемпе музейсене те çитсе курма пулать.
