«Лаша пуласси тихаран, çын пуласси ачаран паллă» ваттисен сăмахĕ хăйĕн пĕлтерĕшне нихăçан та çухатмасть. Ăна Аслă Елчĕкри Г.Н.Волков ячĕллĕ вăтам шкулта вĕренекен Арсений Адюковпа çыхăнтарни те вырăнлă тесе шутлатăп. Пĕчĕк-ха вăл, 2-мĕш класа çеç çỹрет. Çапах та пултарулăхĕ епле тапса тăрать унăн!
Арсений çитĕнекен çемьере виçĕ ывăл. Вăл — вăталăххи. Ашшĕ-амăшĕ вĕсене ĕçпе воспитани парассине уйрăмах мала хурать. Пахчара та, выльăх-чĕрлĕх витинче те аслисемпе пĕрле тăрмашаççĕ пĕчĕкскерсем.
Арсений вĕренỹре те тăрăшуллă. Класс тулашĕнчи мероприятисене хастар хутшăнать. 1-мĕш класранпах спектакльсенчи тĕп сăнарсене вылять. Вĕсене ăста калăпланипе паллă вăл.
Уроксем хыççăн пушă вăхăт çук ачан: килти ĕçсене вĕçлесенех Елчĕкри «Улăп» ФОКа васкать. Ирĕклĕ майпа кĕрешекенсен секцине çỹрет вăл унта. Мал ĕмĕтлĕ ачан çитĕнĕвĕсем те куç кĕрет. Тутарстан Республикинчен, Чĕмпĕр, Санкт-Петербург хулисенчи ăмăртусенчен призер пулса таврăннă вăл.
Маттур ачана ашшĕ-амăшĕ ăнланни, пулăшни вăй парать, çитĕнỹсем тума пулăшать. Эпир те ăнăçу сунатпăр ăна.
Ольга КАЗНАЧЕЕВА,
Аслă Елчĕк шкулĕ.
