Ятарлă çар операцийĕнче кашни салтакпа офицер паттăрлăх кăтартса çĕнтерĕве çывхартаççĕ. Вăл шутра — Лаш Таяпа арĕсем те.
Пирĕн ялтан мобилизаци йĕркипе кайнисенчен унта Иван Енкеев, Алексей Сметанин, Анатолий Сорокин тата Александр Петров. Контракт мелĕпе хутшăнакансем те пур: Игнат Львов, Василий Кириллов, Семен Салмин. Кăçалхи юпа уйăхĕнче хĕрỹ точкăна хăй ирĕкĕпе кайнă Андрей Князева та мухтав сăмахĕ калас килет. Вĕсем пурте Донецк, Луганск Республикисене, Запорожьепе Херсон облаçĕсене фашизм хỹрешкисенчен тасатас тĕллевпе çапăçаççĕ, чăваш ятне ямаççĕ. Тăван çĕршывăн чысне хỹтĕлесе тĕрлĕ наградăна та тивĕçнĕ.
Александр Петрова (ун çинчен уйрăммăн çырас терĕм) Жуков тата «Ятарлă çар операцине хутшăнакана» медальсемпе наградăланă. Вĕсем тăван килĕнче упранаççĕ.
Саша шкулта вĕреннĕ чухнех сăпайлăхпа палăратчĕ, мероприятисене хастар хутшăнатчĕ. Отпуска килсен, пурĕ тăватă хутчен пулнă вăл, кашнинчех ялти чиркỹре Силуан аттерен пил илет. Çулла Чăваш наци телевиденине йыхравларĕç ăна. Передача вăхăтĕнче те вăл хăйне кирлĕ пек тытма пĕлчĕ. Нумай калаçма юратманскер, ытларах пĕрле çапăçакан чăваш ачисен паттăрлăхне палăртрĕ. Чи хакли — çĕнтерỹпе таврăнма ĕмĕтленнине пĕлтерчĕ. Саша сроклă службăна çар разведкинче ирттернин паха енĕ те пулĕ ку. Халĕ вăл — стрелок-пулеметчик, гварди рядовойĕ. Тăшмана Запорожье облаçĕнче хỹтерет.
Ашшĕпе амăшĕ, Николай Петровичпа Любовь Валерьяновна та питĕ шанаççĕ çĕнтерĕве. Салтак амăшĕ тивĕçлĕ канура пулсан та «Улыбка» ача садĕнче ĕçлет. Каçсерен сенкер экран урлă СВОри хыпарсене пăхаççĕ, ывăлĕпе çыхăнăва час-часах тухаççĕ. Çав çыхăну нихăçан та ан тăтăлтăр.
Пирĕн те Сашăна тата ытти паттăрсене çĕнтерỹпе таврăнма сывлăх, телей, ăнăçу сунас килет. Турă пулăшса, вăй-хăват парса пытăр вĕсене. Шанчăка нихăçан та çухатмалла ан пултăр çĕршыв хỹтĕлевçисен.
Валерий ТЕЛЕЙ.
