СССР халăх артисткине Вера Кузьминăна халалланă сăвва илемлĕ вулакансен регионсем хушшинчи конкурсĕ кăçал саккăрмĕш хут иртрĕ.
Шăмалакри тĕп шкулта 7 класра вĕренекен Юлиана Герасимова асăннă конкурса пиллĕкмĕш хут хутшăнчĕ. Кашни çулах вăл конкурсран çĕнтерỹпе таврăнчĕ. Кăçал пултаруллă хĕр ача I степень диплома тивĕç пулчĕ. Вăл сцена çине тухса сăвă вулама пуçласан жюри членĕсем — Чăваш Енĕн паллă çыннисем — ăна сывламасăр тенĕ пек итлерĕç. Жюри членĕ, поэтесса, публицист, драматург Марина Карягина вара чăтса тăраймарĕ, Юлианăна асăнмалăх сувенир парнелерĕ.
Юлиана юрра-ташша та ăста. Вăл ташлакан ушкăн районта иртекен тĕрлĕ конкурса хутшăнса яланах малти вырăнсене йышăнать. Хĕр ача район сцени çине пуçласа 5 çулта чухнех тухнă та çавăнтанпа ун çинчен анман тесен те юрать пулĕ. Ялти культура çуртĕнче иртекен пĕр уява та хутшăнмасăр юлмасть: тăтăшах чуна пырса тивекен сăвăпа халăха савăнтарать е илемлĕ ташăпа тыткăнлать.
Вĕренỹре Юлиана яланах малтисен ретĕнче. Тĕрлĕ предмет олимпиадисене хутшăнса вăл призерсен йышне кĕнĕ.
Н.ГЕРАСИМОВА.
Сăн ỹкерчĕкре: Ю.Герасимова.
