Хальхи вăхăтра Раççейре кашни 4-мĕш преступлени — киберултав.
Чылай чухне ултавçăсем çынсен банк карточки çинчен укçа куçараççĕ, лешсем сиссе те юлаймаççĕ. Çĕршыв шайĕнче киберпĕлỹлĕх енĕпе проект пуçарасси пирки шухăшлаççĕ. Ку ыйтăва РФ Президенчĕн федерацин Атăлçи округĕнчи полномочиллĕ Представителĕ Игорь Комаров Чăваш Ене «Финанс пĕлĕвне ỹстересси: трендсем, тĕллевсем, малашлăх» форума килсен хускатнă.
Форума пысăк шайри экспертсем пухăннă. Финанс пĕлĕвĕн тытăмĕнчи патшалăх политикине сỹтсе явнă. XXI ĕмĕрте финанс пĕлĕвĕ пĕлтерĕшлĕ вырăн йышăннине палăртнă. Çĕршыври кашни регионта ăна ỹстерес тĕлĕшпе ятарлă программăсемпе стратеги пĕлтерĕшлĕ документсем хатĕрленĕ.
