Çирĕклĕ Шăхалĕнчи пĕтĕмĕшле пĕлỹ паракан вăтам шкулта вырăссен аслă педагогĕ тата писателĕ Константин Ушинский çуралнăранпа 200 çул çитнине халалласа ăс-хакăл вăййи ирттернĕ.
Директорăн воспитани енĕпе ĕçлекен советникĕ Галина Чернова мероприятие 9-10 классенче вĕренекенсене йыхравланă. Командăсем 5 темăри ултшар ыйту çине тĕрĕс хурав палăртса хăйсен тавра курăмне кăтартнă. Çĕнтерỹçĕ — 10-мĕш класри «Пĕлỹ ăстисем» команда.
Ачасем вĕрентỹпе воспитанири паллă наставникăн пурнăçĕпе ĕç-хĕлне, унăн тĕп идейисене ăша хывни пысăк пĕлтерĕшлĕ пулнине палăртнă.
— Ун çинчен пирĕн пĕлмелле, ыттисене те пĕлтермелле, — пĕтĕмлетỹ тунă вĕренекенсем.
К.Ушинскин юбилейĕ тĕлне Кушкăри вăтам шкулта вара пысăк курав йĕркеленĕ.
