«Хăтлă хула хутлăхне йĕркелетпĕр» федераци проекчĕпе килĕшỹллĕн апрелĕн 15-мĕшĕнчен черетлĕ хут хăтлăх кĕртессипе çыхăннă объекта палăртассипе Пĕтĕм Раççейри сасăлав иртет.
Асăннă проект çĕршывра РФ Президенчĕн хушăвĕпе 2017 çулта пурнăçа кĕме пуçланă. Унăн тĕп тĕллевĕ — ял-хула сăн-сăпатне улăштарасси, кунта пурăнакансен пурнăç условийĕсене лайăхлатасси, паянхи пурнăç ыйтнă пек обществăлла хутлăхсем йĕркелесси.
14 çултан аслăрах гражданин 21.gorodsreda.ru. платформа çинче тирпей-илем кĕртмелли вăл е ку территоришĕн хăйĕн сассине пама пултарать. Кăçалхи сасăлава хутшăнса эсир «Ырсамай» кану паркне е Аслă Елчĕкри сквера тирпей-илем кĕртессишĕн сасăлама пултаратăр. Пуринчен ытла сасă пухнă проекта хăтлăхпа тирпей-илем кĕртмелли списока кĕртеççĕ, çитес çул вара çак ĕçе пурнăçлама патшалăх укçа-тенкĕ уйăрĕ.
Округшăн пысăк та пĕлтерĕшлĕ мероприяти ку. Айккинче тăрса юлас марччĕ. Сасăлав тапхăрĕнче сирĕнпе волонтерсем те тĕл пулма е телефонпа çыхăнма пултарĕç.
