Хальхи вăхăтра Мускаври ВДНХра «Раççей» курав малалла ĕçлет. «Чувашия благодарит» («Чăваш Ен тав тăвать») ят панă республика экспозицине.
Чăвашсем унта ытти пуянлăхăмăрпа пĕрле «Тухья» арт-объект илсе кайнă. Хĕрсем пуçа тăхăннă арт-объект çỹллĕшĕ — 6 метр. Ăна алăпа ăсталанă, вăл 217 çутă элементĕнчен тăрать. Экспозицире мĕн пулса иртнине кура çутă тĕсĕ ылмашать.
Çак кунсенче экспозиципе Чăваш патшалăх академи драма театрĕн артисчĕсем — Раççей халăх артистки Нина Яковлева, ЧР халăх артисчĕсем Иван Иванов, Валентина Иванова, Геннадий Медведев тата Чăваш патшалăх оперăпа балет театрĕн артисчĕ Василий Николаев паллаштарнă. «Тăванлăх алтăрне йăтса» концерт хатĕрленĕ.
