Акционерсен «Прогресс» хупă обществинче ĕç сыхлавĕн йĕркисене çирĕп пăхăнаççĕ. Ку тĕллевпе дирекци кашни çул сахал мар укçа-тенкĕ уйăрать.
Çаксене пурне те ĕçлекен çынсен сывлăхĕшĕн тата хăрушсăрлăхĕшĕн тăрăшса тăватпăр. Ял хуçалăх предприятийĕн фермисемпе уй-хирĕсенче вăй хуракансене планпа килĕшÿллĕн çулсерен медосмотр кăларассине йĕркеленĕ. Ĕç вырăнĕсене аптечкăсемпе, пĕрремĕш пулăшу памалли ытти медикаментсемпе, вут-çулăма хирĕç кĕрешмелли хатĕрсемпе — огнетушительсемпе, пушар инвентарĕпе туллин тивĕçтернĕ. Ĕç тумтирĕ туянса парасси те çирĕп йăлана кĕнĕ.
Наряд-допускпа — çынсем КЗСпа, тырă типĕтекен кăмакасемпе, шыв башнисен тăрринче ĕçленĕ чухне инкек-синкек пуласран çирĕп асăрханатпăр. Техника хăрушсăрлăхĕ енĕпе иртнĕ çулхи сентябрь уйăхĕнче вĕренсе алла илнĕ удостоверенисем срокран тухнă май, хуçалăхри специалистсене /бригадирсене, фермăсен заведующийĕсене/ Шупашкартан килнĕ специалистсем çĕнĕрен вĕрентсе ятарлă документсем пачĕç. Пурĕ 17 çын техника, 3 çын пушар хăрушсăрлăхĕ, 2 çын гражданла оборона енĕпе вĕренчĕç.
Ака, вырма вăхăтĕнче аякри хирсенче ĕçлекен техникăна ĕç хыççăн та унтах хăварнă. Вĕсене çĕрлехи вăхăтра сыхлама дежурство йĕркелетпĕр.
Техника, пушар хăрушсăрлăхĕн йĕркисене пăхăнса ĕçлесен инкек-синкекрен асăрханма пулĕ. Чи хакли сывлăх пулнине самантлăха та манса каяр мар. Ял хуçалăх предприятийĕнче планпа палăртнă медицина тĕрĕслевĕ витĕр тухнисĕр пуçне, кашни 3 çулта вырăнти поликлиникăра йĕркелекен тÿлевсĕр диспансеризаци витĕр тухассине те хастарлăрах хутшăнма кирлине палăртса калатпăр.
Инкек-синкек ан пултăр тесен техника, пушар хăрушсăрлăхĕн йĕркисене çирĕп пăхăнса, тĕрĕс пурнăçласа пымалла.
М.КУПРИЯНОВ,
акционерсен «Прогресс» хупă обществин техника хăрушсăрлăхĕ енĕпе ĕçлекен инженерĕ.
