Ытти тăрăхра мĕнле пулĕ те, Елчĕк енре вара кашни ял хăйĕн уявне анлăн паллă тăвать. Чи пысăк пĕлтерĕшли – ял çыннисем тăван ял историне пĕлни, ырă йăла-йĕркене манманни, ăна çамрăксенче упраса хăварас тесе ăнтăлни.
Аслă Елчĕксен уявĕ кĕр мăнтăрĕпе пĕр килнĕрен ăна кашни çулах тулли кăмăлпа кĕтсе илеççĕ. Йăлана кĕнĕ тăрăх, чи малтанах ватăсемпе çамрăксем Христос Чĕрĕлнин ячĕллĕ чиркĕве кĕлле пуçтарăнаççĕ. Кăçал та Максим атте тĕне ĕненекенсене пысăк уяв ячĕпе саламланă, уяв литургийĕ ирттернĕ.
Культура çурчĕ умĕнче тĕрлĕ аттракцион ĕçлерĕ. Çанталăк сулхăнлатнине пăхмасăр ача-пăча тĕрлĕ вăйăра выляса киленчĕ. Культура çуртĕнчи фойере «Ылтăн кĕркунне парнисем» выставка хатĕрленĕ. Шкул ачисем килти пахчара ÿстернĕ улма-çырларан, пахча çимĕçрен мĕнле кăна ÿкерчĕксем ăсталаман-ши;
Уяв яланхиллех спорт ăмăртăвĕсемпе пуян. Тĕрлĕ енĕпе вăй виçсе хăйсен ăсталăхне тĕрĕслерĕç шкул ачисем. Ялти спонсорсем хавхалантарнăран мала тухнисем грамотăсемпе укçан призсене тивĕçрĕç.
Уява пуçтарăннисене Аслă Елчĕк ял тăрăхĕн пуçлăхĕ В.Афанасьев, район администрацийĕн пуçлăхĕн пĕрремĕш çумĕ-вĕренÿпе çамрăксен политикин пайĕн ертÿçи Л.Левый, Ленин ячĕллĕ ял хуçалăх производство кооперативĕн председателĕ В.Падуев, ялăн хисеплĕ гражданинĕ А.Молоствов, В.Чернов уйрăм предприниматель саламларĕç, çирĕп сывлăх, ĕçре пысăк çитĕнÿсем сунчĕç.
Кашни çулах ял уявĕнче «Ялăн чи лайăх урамĕ», «Чи лайăх хушма хуçалăх» смотр-конкурса пĕтĕмлетеççĕ. Чи лайăххисен йышне кăçал Ленин урамĕ тата Геннадипе Валентина Вастуловсен хуçалăхĕ кĕчĕç.
Уява Аслă Елчĕксен çамрăк ташăçисем, чăваш эстрада çăлтăрĕсем ташă-юрăпа илем кÿчĕç. Ял çийĕн йăлтăртатнă фейерверк та уяв кăмăллă иртнине систерчĕ.
В.АЛЕКСЕЕВА.
