Чăваш Республикинчи тутар наципе культура автономине малашне Ильдус Шайдуллин ертсе пырĕ.
Çакăн пек йышăну тунă Комсомольски районĕнчи Урмаел ялĕнче иртнĕ канашлура. Унчченхи председатель Ферит Гибатдинов вăхăтсăр пурнăçран уйрăлнăран çĕнĕ ертÿçе палăртма тивнĕ. Ильдус Шайдуллин шăпах Ферит Гибатдиновăн вĕренекенĕ. Хальхи вăхăтра Комсомольскинчи ача-пăча искусство шкулĕнче тăрăшать.
Аса илтеретпĕр, Чăваш Енре 36 пин тутар пурăнать. Вĕсенчен ытларахăшĕ Патăрьел тата Комсомольски районĕсенче тĕпленнĕ.
