Июнĕн 26-мĕшĕнче Чăвашпотребсоюз массăллă информаци хатĕрĕсен представителĕсемпе Тăвай райповĕн предприятийĕсем тăрăх пресс-тур йĕркелерĕ. Вĕсем суту-илỹ çурчĕсен, çăкăр завочĕн, хатĕрлев пункчĕн ĕçĕ-хĕлĕпе паллашрĕç. Пресс-тур хыççăн райпо офисĕнче семинар-канашлу иртрĕ.
Чăвашпотребсоюз канашĕн председателĕ Валерий Павлов палăртнă тăрăх, иртнĕ çул суту-илỹ тата общество апатланăвĕн çаврăнăшĕ 9133 млн тенкĕпе танлашнă. Медицина, ветеринари аптекисем те ăнăçлă ĕçленĕ. Пĕлтĕр çăкăр тата çăкăр-булка изделийĕсене 7 пин тонна ытла хатĕрлесе кăларнă, çулсерен çĕнĕ продукци кĕртеççĕ.
Хушма хуçалăхсенчен аш-какай, сĕт, пахча çимĕç йышăнаççĕ. Вĕсене кайăк-кĕшĕкпе, комбикормпа тивĕçтереççĕ, саккаспа тавар илсе килсе параççĕ. Автолавккасем аякри пĕчĕк ялсене те çитеççĕ. Райпо пурнăçран юлмасть, ĕçе çĕнĕлле йĕркелет, сентресене таварпа пуянлатсах тăрать. Конкуренци çивĕчленнине пăхмасăр Чăвашпотребсоюз предприятийĕсем рынокра тарăн тымар янă — 130 çул ытла вăл халăх ырлăхĕшĕн тăрăшать.
Канашлу хыççăн кооператорсен ĕç-хĕлне çутатса тăракан хаçатçăсене наградăсемпе хавхалантарчĕç.
