Ноябрĕн 13-мĕшĕнче Пĕтĕм тĕнчери куç курманнисен кунĕнче Елчĕкри тĕп библиотека ĕçченĕсем «Шурă туя» клуб членĕсемпе пĕлỹ сехечĕ йĕркелерĕç.
Унăн тĕп тĕллевĕ «Особый взгляд» мобильлĕ приложени урлă суккăр тата япăх куракан çынсене автоматизациленĕ тифлокомментировани мелĕпе (ятарлă сăмахсемпе ăнлантарса памасăрах) усă курса лару-тăрăва пĕлме хăнăхтарасси пулчĕ. Тĕплĕнрех каласан, тифлокомментаторсем куç курман çынсене ỹкерчĕксен, фильмсемпе спектакльсен, ытти искусство произведенийĕсен тата медиа тĕсĕсен содержанийĕсемпе паллашма пулăшаççĕ. Ку чухне куç курман çынсем хăлхисене наушниксем тăхăнса ăнлантарса панине итлеççĕ.
Светлана САЙКИНА.
