Шупашкарти Ленин районĕн сучĕ наркотиксен икĕ сутуçи тĕлĕшпе пуçарнă уголовлă ĕçпе приговор палăртнă. Вĕсем наркăмăша каварлашса пысăк виçепе сутма тăнă та — яваплăх пушшех çирĕп.
Преступление Федерацин хăрушсăрлăх службин республикăри управленийĕн следстви органĕ тĕпченĕ. Вăл палăртнă тăрăх, туссем пĕлтĕрхи чỹк уйăхĕнчен тытăнса кăçалхи пуш уйăхĕччен кỹршĕ регионсенче синтетика наркотикĕ туяннă. Наркотик сутакан вăрттăн интернет-лавккан следстви тупса палăртман администраторĕ урлă ĕçленĕ. Наркăмăша Чăваш Ене илсе килнĕ, Шупашкарта вăрттăн «закладкăсене» хурса сутнă. Мефедронăн 0,35 килограмм таякан черетлĕ партине сутма тăнă чухне вĕсене ФХС оперативникĕсем тытса чарнă.
Суд пĕрне 8,5 çуллăха ирĕксĕр хăвармалли приговор палăртнă, тепри çирĕп режимлă колонире 9 çул ирттерĕ.
