Фонтана мĕншĕн чарĕç?
Шупашкарти тĕп фонтана кашни ытларикун санитари ĕçĕсем ирттерме чарĕç.
Профилактика кунĕнче расписани улшăнĕ: пĕрремĕш çурринче фонтан ĕçлемĕ, анчах 18-22 сехетсенче музыка программипе киленме пулĕ.
Асăрхăр! Фонтанри шыва ĕçме юрамасть. Ку вар-хырăм инфекцийĕ, конъюнктивит тата респиратор чирĕ патне илсе çитерме пултарать.
Аслă шкула – почта урлă
Аслă шкула вĕренме кĕрес текенсем документсене йышăну комиссине почта урлă та ярса параяççĕ. Ку çĕнĕлĕх эпидеми лару-тăрăвĕпе çыхăннă.
Документсене Раççей Почтин кирек хăш уйрăмĕнчен те ăсатма пулать. Чи кирли, çыру мĕн вăхăт каяссине шута илмелле, йышăну комиссийĕн адресне тĕрĕс палăртмалла, документсене саккаспа е бандерольпе ямалла, трек-номер /унпа çырăва йĕрлеме пулать/ палăртнă квитанцие упраса хăвармалла.
Чарăну ятне улăштарĕç
Шупашкарти «Çеçпĕл» кинотеатр» чарăну малашне «Çеçпĕл Мишши ячĕллĕ Çамрăксен театрĕ» ятлă пулĕ.
Кинотеатр ĕçĕ-хĕлĕ 2014 çултах чарăннă, 2016 çулта унăн çуртне Çеçпĕл Мишши ячĕллĕ Çамрăксен театрĕ вырнаçнă.
