Мучар ялĕнче Пулăçăсен ăмăртăвĕ иртрĕ. Ăна йĕркелỹçĕсем Халăхсен пĕрлĕхĕн тата Туслăхĕн çулталăкне, Питрав уявне халалларĕç. Çак кун кỹлĕ йĕри-тавра ирех халăх пуçтарăнчĕ: кĕçĕннисем, аслă çулхисем, ашшĕ-амăшĕ пулăçсене хавхалантарма килнĕ. 33 çын хутшăнчĕ ăмăртăва, чи кĕçĕнни — Ульяна Егорова пулчĕ, вăл 7 çулта. Валерий Краснов вара — чи асли, 67 çулта. Ăмăрту 3 сехете тăсăлчĕ, çав хушăра пулă шỹрпи те пиçрĕ. Хĕрỹ тупăшура Илья Федоров — 1-мĕш, Яна Поляруш — 2 -мĕш, Петр Краснов 3-мĕш вырăна тухнине палăртма кăмăллă. Чи пысăк пулă тытакан — Андрей Захаров.
Çирĕклĕ Шăхальсемпе Мучарсем çак пĕрлехи мероприятие йĕркелесе ирттерни питĕ кăмăллă пулчĕ, вăл аслă çулхисемпе кĕçĕннисене пĕр-пĕринпе хутшăнма та май пачĕ.
Тупăшура туслă çемьесем — Егоровсем, Муравьевсем, Захаровсем, Васильевсем тата ыттисем — хастарлăхпа палăрчĕç.
Владимир Васильев йĕркелỹçĕ ку уява малашне те ирттерессе пĕлтерчĕ.
Тытнă чĕрĕ пулăсене пурте пĕр шухăшлă пулса каялла кỹлле ячĕç. Малалла ỹсчĕр.
Нина ЛЕВАЯ.
