Раççей Президенчĕн Владимир Путинăн хушăвĕпе РФ Строительство министерстви «Пурăнмалли çурт-йĕр тата хула хутлăхĕ» наци проекчĕпе килĕшÿллĕн Раççей хулисенчи хула хутлăхĕн пахалăхĕн рейтингне пăхса тухнă.
Строительство министерстви 1114 хулана халăх йышне кура çичĕ ушкăна пайласа анализ тунă. Унта 36 тĕрлĕ палăрткăча шута илнĕ. Кашни хула 0-рен пуçласа 360 балл илме пултарнă. 180 бала çитейменнисем хăтлă маррисен йышне кĕнĕ.
Хаклав тăрăх 5 пинрен 25 пин пурăнакан пĕчĕк хуласенчен Етĕрне 193 балл, 25 пинрен 50 пинлĕ хуласенчен Канаш 201 балл, Улатăр 183 балл, 100 пинрен 250 пин пурăнакан халăхлă пысăк хуласенчен Çĕнĕ Шупашкар 180 балл пухнă.
Чăваш Республикин тĕп хули – Шупашкар 205 балл пуçтарнă. Çак кăтарту Атăлçи федераци округĕнчи 250 пинрен пуçласа 1 миллион пурăнакан халăхлă пысăк хуласенчен чи лайăххи.
Тĕпчев кăтартăвĕсене патшалăхăн регионти хальхи хула хутлăхĕ федераци программисене ĕçе кĕртнĕ май субсиди уйăрнă чухне усă кураççĕ.
