Аслă Пăла Тимешĕнчи почта çыхăну уйрăмĕнчи почтальонсем, декабрĕн 22-мĕшĕ тĕлне пĕтĕмлетнĕ тăрăх, район хаçатне 2021 çулхи пĕрремĕш çур çулта илсе тăма пурĕ 233 экземпляр /кăçалхи иккĕмĕш çур çулта та 233 пулнă/ çырăнтарнă. Çырăнтару тапхăрĕ вара вĕçленмен-ха, вăл малалла пырать…
Çыхăну уйрăмĕн начальникĕ Зоя Елисеева почтальонкăсен – Елена Дергунова /Кушкă/, Елена Сергеева /Аслă Пăла Тимеш/, Регина Иноходова /Исемпел/ ĕçĕпе кăмăллă. Сăмах май, вăл кунта хăй те чылай çул тÿрĕ кăмăлпа вăй хунăран ял-йыш хисепне çĕнсе илнĕ.
Коллектива çамрăксем хутшăнни те малашлăха шанма хистекен ырă пулăм. Почта çыхăну уйрăмне нумаях пулмасть Татьяна Елисеева ĕçе вырнаçнă, ăна оператор тивĕçне шанса панă.
Аса илтеретпĕр: «Елчĕк ен» хаçата çитес çур çула çырăнса илме ĕлкĕрĕр. Хакĕ – 458 тенкĕ те 58 пус. Альтернативлă майпа – 270 тенкĕ.
