Килти сĕт хăвăрт йỹçет, лавккаран туянни вара темшĕн йỹçмест. Унта сиенлĕ япала ярса тултармаççĕ-ши?
Сĕт-çу заводĕнче сĕте вĕрилентерсе хатĕрлеççĕ. Çак ĕç унри сиенлĕ япаласене пĕтерет. Хатĕрлев тĕрлĕ майпа пулать:
— Пастеризациленĕ чухне сĕте 60-70 (хăш-пĕр чухне 90) градуса çитерсе ятарлă вăхăт тытаççĕ. Тĕслĕхрен, 30 минут. Ку сиенлĕ микроорганизмсене пĕтерме пулăшать.
— Ультрапастеризациленĕ чухне 134-137 градуса хăвăрт çитерсе 2-4 çеккунт тытаççĕ те хăвăртрах сивĕтеççĕ. Кун пек чухне сиенлĕ микроорганизмсем йăлтах пĕтеççĕ тесен те юрать.
— Стерилизациленĕ май сĕте 100 градусран ытларах вĕрилентереççĕ, çапла 20 минут тытаççĕ. Ун хыççăн сĕтре чĕрĕ микроорганизмсем, вĕсене ĕрчемелли япаласем нимĕн те юлмаççĕ.
