Республикăри оперативлă штаб хыпарлавĕ тăрăх, коронавируспа чирлекенсен йышĕ эрнесерен чакса пырать. Анчах лăпланма иртерех, инфекци ниçта та çухалман – пирĕнпе юнашарах.
Хăрушлăх сĕврĕлменнине районти кăтарту та çирĕплетет – ĕнерхи куна 101 çынна регистрациленĕ. Çавăнпа чару мерисем çаплах вăйра юлаççĕ-ха: дистанцие пăхăнасси, халăх йышлă вырăнта маска тăхăнасси. Çакна лавккасенче е ытти учрежденисенче уйрăмах çирĕп пăхăнни кирлĕ.
Вырăнсенчи лару-тăрупа паллашас, профилактика мероприятийĕсем йĕркелес тĕлĕшпе мобильлĕ ушкăнсем çав-çавах рейдсем ирттереççĕ. Халăха социаллă пулăшупа тивĕçтерекен центр тата ВДПО ĕçченĕсем те çак кунсенче Çирĕклĕ Шăхальти ватăсем вăхăтлăх пурăнакан стационар уйрăмĕнче пулнă, инфекцие хирĕçле профилактика ĕçĕсене лайăх йĕркеленине палăртнă.
Умра – кĕркунне, грипп тата ОРВИ сезонĕ çывхарать. Çавăнпа вакцинаци тăвассине те халех шута илес пулать.
