Сумлӑ ӑсчахӑмӑра асӑнса республикӑра тӗрлӗ ӗҫ-пуҫ иртрӗ. Иван Яковлев ячӗллӗ Чӑваш патшалӑх педагогика университетӗнче этнопедагогика никӗслевҫин пурнӑҫӗпе, ӗҫӗ-хӗлӗпе паллаштаракан курав уҫӑлчӗ, ӑсчахсем, вӗренӳ учрежденийӗсенче ӗҫлекенсем, аспирантсемпе магистрантсем ҫавра сӗтел тавра пухӑнчӗҫ.
Хальхи вӑхӑтри педагогика аталанӑвне, этнопедагогикӑпа ҫыхӑннӑ пӗлтерӗшлӗ те ҫивӗч ыйтусене сӳтсе яврӗҫ вӗсем. Видеоҫыхӑну мелӗпе уява ытти тӑрӑхри ӗҫтешӗсем те хутшӑнма пултарчӗҫ. Геннадий Никандрович Волкова Чӑваш Енре кӑна мар, нумай-нумай ҫӗршывра пӗлеҫҫӗ, хисеплеҫҫӗ. Вӑл — Чӑваш тата Калмӑк республикисен хисеплӗ гражданинӗ. Чӑваш патшалӑх педагогика университетӗнче Геннадий Волков академик вӗрентӗвне, вӑл никӗсленӗ йӑла-йӗркесене манӑҫа кӑлармаҫҫӗ, вӗсене аталантарса пыраҫҫӗ.
