Раççей Федерацийĕн тава тивĕçлĕ врачĕ Валентина Теллина-Табакова Хусанти медицина институтне вĕренсе пĕтернĕ хыççăн Елчĕк районĕнчи сыватмăшсенче, унтан Шупашкарти строительсен поликлиникинче чĕрĕк ĕмĕр тĕп тухтăрта вăй хунă. Çĕнĕ ĕмĕр пуçламăшĕнче вăл — ЧР Патшалăх Канашĕн депутачĕ. Валентина Андреевна Чăваш АССР тава тивĕçлĕ строителĕпе Ардалион Теллинпа çемье çавăрса икĕ ывăл — Димăпа Женя çитĕнтернĕ.
Сăмахăм малалла аслă ывăлĕ пирки. Дмитрий 1980 çулта Аслă Пăла Тимеш ялĕнче çуралнă. И.Н.Ульянов ячĕллĕ Чăваш патшалăх университетне пĕтернĕ. 2002-2018 çулсенче республикăри прокуратура органĕсенче службăра тăнă. 2018-2021 çулсенче — РФ Атăлçи федераци округĕн Тĕп прокуратурин Управленийĕн сотрудникĕ, 2021-2022 çулсенче — Ненец автономи округĕн прокурорĕн çумĕ. Раççей Президенчĕн 2022 çулхи апрелĕн 4-мĕшĕнчи Указĕпе килĕшỹллĕн Дмитрий Ардалионовича Севастополь хулин прокурорĕн пĕрремĕш заместительне çирĕплетнĕ. Нумаях пулмасть вара ăна юстицин генерал-майорĕ званине (Патшалăхăн 3-мĕш класлă юстици советникĕ) панă.
Сăмах май, Теллинсен кĕçĕнни, Евгений Ардалионович, пĕр вăхăталлах Чăваш Республикин промышленноçпа энергетика министрĕн çумĕ пулса тăчĕ.
Петр СИДОРОВ.
