Хăш-пĕр вăрттăнлăха пĕлни кил хуçи хĕрарăмĕн ĕçне самай çăмăллатать. Эппин, вĕсемпе усă курăр.
— Сĕт вĕретнĕ чухне вăл газ плити çине тăкăнсан çав вырăна тăвар сапмалла, йĕпе хутпа витмелле. Çапла çунăк шăрши сарăлмĕ.
— Кĕрпене, крахмала тимĕр, кантăк виткĕчпе хупăнакан савăтра упрамалла. Хурт-кăпшанкă таврашĕ ан ĕрчетĕр тесен марльăпа çавăрса çыхнă тăвар хумалла.
— Çăнăх миххине хуппинчен тасатман ыхра хумалла — хурт-кăпшанкă ĕрчемĕ.
— Çĕççе, хачча хăйриччен кăштах тăвар хушнă шыва çур сехетлĕхе ямалла, унтан кăларсан типĕтмелле мар.
— Аш арманне çуса тасатма ансат мар. Ĕç çăмăллантăр тесен юлашкинчен чĕрĕ çĕр улми ярса авăртмалла.
— Аш арманне батарей çывăхĕнче типĕтмелле мар — çĕççи мăкалать.
